मुंबई: आगामी स्थानिक स्वराज्य संस्था निवडणुकांच्या तोंडावर महायुतीमधील घटक पक्षांमध्ये जागावाटपावरून धुसफूस सुरू झाली आहे. काही नेत्यांकडून होत असलेल्या ‘स्वबळाची भाषा’ लक्षात घेता, राज्याचे उद्योगमंत्री आणि शिवसेना नेते उदय सामंत यांनी मित्रपक्षांना सज्जड दम दिला आहे. “जर कुणाला खुमखुमी असेल, तर धनुष्यबाण कसा चालतो ते दाखवून देऊ,” अशा थेट शब्दांत सामंत यांनी चिपळूण येथील एका कार्यक्रमात इशारा दिला आहे.

“…तर धनुष्यबाण कसा चालतो ते दाखवून देऊ”

चिपळूण येथील शिवसेनेच्या (शिंदे गट) पदाधिकाऱ्यांच्या बैठकीत बोलताना उदय सामंत यांनी महायुतीतील काही स्थानिक नेत्यांच्या वक्तव्यांचा समाचार घेतला. ते म्हणाले, “तालुक्यात काहीजण स्वबळाची भाषा करू लागले आहेत. आम्ही स्वबळावर लढू आणि जिंकून दाखवू, आमच्याकडे अमुक-तमुक संस्था आहेत, अशी भाषा केली जात आहे.”

यावर सडेतोड उत्तर देताना सामंत म्हणाले, “माझी सर्वांना एकच विनंती आहे की, आपल्याला महायुतीमधूनच निवडणुका लढवायच्या आहेत. परंतु, कुणाला खुमखुमी असेल तर धनुष्यबाण कसा चालतो ते दाखवण्याची व्यवस्था देखील केली जाईल.” सामंत यांच्या या वक्तव्यामुळे महायुतीतील अंतर्गत मतभेद पुन्हा एकदा चव्हाट्यावर आले आहेत.

स्थानिक स्वराज्य निवडणुकांची रणधुमाळी

सर्वोच्च न्यायालयाच्या आदेशानंतर राज्यात रखडलेल्या स्थानिक स्वराज्य संस्थांच्या निवडणुकांचा मार्ग मोकळा झाला आहे. नोव्हेंबर महिन्यात निवडणुकीची घोषणा होऊन, डिसेंबरच्या पहिल्या आठवड्यात २४७ नगरपालिका आणि १४७ नगरपंचायतींच्या निवडणुका होण्याची शक्यता आहे. याच पार्श्वभूमीवर सर्वच राजकीय पक्षांनी मोर्चेबांधणी सुरू केली आहे. महायुती म्हणून एकत्र लढण्याचे वरिष्ठ नेत्यांचे ठरले असले, तरी स्थानिक पातळीवर मात्र वेगळे चित्र दिसत आहे.

स्वबळाची भाषा’ वापरणाऱ्या मित्रपक्षांना थेट इशारा?

चिपळूणमध्ये स्थानिक भाजप पदाधिकाऱ्यांकडून स्वबळावर लढण्याची तयारी सुरू असल्याची चर्चा आहे. याच पार्श्वभूमीवर उदय सामंत यांनी दिलेला इशारा थेट मित्रपक्षालाच असल्याची राजकीय वर्तुळात चर्चा आहे. लोकसभा आणि विधानसभेनंतर आता स्थानिक स्वराज्य संस्थांच्या जागावाटपावरून महायुतीत मोठा संघर्ष पेटण्याची चिन्हे आहेत.

महायुतीत स्थानिक पातळीवर धुसफूस

महायुतीमध्ये लोकसभा आणि विधानसभा निवडणुकीत एकी दिसली असली, तरी स्थानिक पातळीवर मात्र चित्र वेगळे आहे. अनेक ठिकाणी भाजप, शिवसेना (शिंदे गट), आणि राष्ट्रवादी (अजित पवार गट) यांचे कार्यकर्ते आणि स्थानिक नेते आपापल्या पक्षाचा विस्तार करण्यासाठी आग्रही आहेत. याच पार्श्वभूमीवर ही ‘स्वबळाची भाषा’ सुरू झाली असून, ती थेट वरिष्ठ नेत्यांपर्यंत डोकेदुखी ठरत आहे. उदय सामंत यांचा हा इशारा याच स्थानिक गटबाजीला दिलेले उत्तर मानले जात आहे.

उदय सामंत यांनी दिलेल्या या इशाऱ्यानंतर महायुतीतील वरिष्ठ नेते काय भूमिका घेतात हे पाहणे महत्त्वाचे ठरेल. एकीकडे महायुती म्हणून लढण्याची भाषा होत असताना, दुसरीकडे स्थानिक नेत्यांची ही ‘स्वबळाची भाषा’ जागावाटपात मोठी डोकेदुखी ठरू शकते. त्यामुळे आगामी काळात मित्रपक्षांमधील हा वाद शमतो की आणखी भडकतो, याकडे संपूर्ण महाराष्ट्राचे लक्ष लागले आहे.