स्वराष्ट्र माझा न्यूज
बीड: मराठा आरक्षण नेते मनोज जरांगे पाटील यांनी मंत्री धनंजय मुंडे यांच्यावर अत्यंत गंभीर आरोप करत एक ऑडिओ क्लिप पत्रकार परिषदेत ऐकवली आहे. मुंडेंनी आपल्या हत्येचा कट रचल्याचा आणि त्यासाठी अडीच कोटींची सुपारी दिल्याचा गौप्यस्फोट जरांगेंनी केला. “धन्या, तू आता पक्का अडकला,” असे म्हणत त्यांनी मुंडेंना थेट आव्हान दिले आहे.
मुंडेंची नार्को टेस्टची मागणी, जरांगेंचे सडेतोड उत्तर
यापूर्वी मनोज जरांगे पाटील यांनी मुंडेंवर हत्येचा कट रचल्याचा आरोप केला होता. त्याला उत्तर देताना धनंजय मुंडे यांनी हे आरोप फेटाळून लावत, “हे थोतांड बंद करा” असे म्हटले होते. तसेच, मुंडेंनी स्वतःची आणि जरांगे यांची नार्को टेस्ट (Narco Test) करण्याची व प्रकरणाचा सीबीआय तपास करण्याची मागणी केली होती.
पत्रकार परिषदेत ऑडिओ क्लिप ऐकवली
धनंजय मुंडे यांच्या मागणीला उत्तर देण्यासाठी घेतलेल्या पत्रकार परिषदेत, मनोज जरांगे पाटील यांनी आपण स्वतः नार्को टेस्टसाठी अर्ज करणार असल्याचे जाहीर केले. “मी जातवाण आहे, मी असे खुनाचे आरोप करू शकत नाही,” असे ते म्हणाले. “धन्या, तू काय सीबीआयची मागणी करतो?” असा सवाल करत, जरांगेंनी थेट एक ऑडिओ क्लिपच (Audio Clip) ऐकवली.
क्लिपमधील ‘ते’ दोन आरोपी कोण?
ही ऑडिओ क्लिप ऐकवल्यानंतर जरांगे म्हणाले की, “या क्लिपमध्ये दोन आरोपी आहेत. तुम्ही पैशांसाठी समाजाच्या मूळावर उठतात का?” “धन्या, तू आता पक्का अडकला आहेस,” असा पुनरुच्चार त्यांनी केला. या नव्या ऑडिओ क्लिप बॉम्बमुळे बीडच्या राजकारणात मोठी खळबळ उडाली असून, आता धनंजय मुंडे यावर काय प्रतिक्रिया देतात याकडे संपूर्ण महाराष्ट्राचे लक्ष लागले आहे.
पुढील घडामोडींसाठी SwarashtraMaza.com वाचत रहा.
