स्वराष्ट्र माझा न्यूज
कल्याणच्या योगीधाम परिसरातील घटना: राजकीय वातावरण तापलं
कल्याणच्या योगीधाम परिसरातील अजमेरा सोसायटीमध्ये गुरुवारी संध्याकाळी घडलेल्या घटनेमुळे राजकीय वातावरण चांगलंच तापलं आहे. एका परप्रांतीयाने मराठी व्यक्तीला बेदम मारहाण केल्याने हा विषय आता राजकीय चर्चेचा केंद्रबिंदू बनला आहे. मनसेने घटनेचा निषेध करत आंदोलनाचा इशारा दिला आहे, तर शिवसेना (उद्धव ठाकरे गट) ने थेट राज्य सरकारला लक्ष्य केलं आहे.
मराठी माणसावर हल्ला: संजय राऊतांचा मुख्यमंत्री-उपमुख्यमंत्र्यांवर हल्लाबोल
शिवसेना (उद्धव ठाकरे गट) चे खासदार व मुख्य प्रवक्ते संजय राऊत यांनी आज सकाळी माध्यमांशी बोलताना घटनेवर तीव्र प्रतिक्रिया दिली. “कल्याणमध्येच नव्हे, तर मुंबईतही मराठी माणसांना दुय्यम वागणूक दिली जात आहे. कालच्या घटनेत मराठी माणसाला शिव्या देण्यात आल्या, अपमान करण्यात आला. ही घटना राज्य सरकारसाठी लज्जास्पद आहे,” असे राऊत म्हणाले.
“मराठी माणसाला कमजोर करण्याचा कट”
संजय राऊतांनी भाजप व मोदी-शाह यांच्यावरही गंभीर आरोप केले. “मराठी माणसांची ताकद कमी करण्यासाठी हे सर्व केलं जात आहे. निवडणूक निकालांनंतर मराठी माणसांवर हल्ले होत आहेत. मुंबईतील मराठी माणसांना संपवण्याचा डाव उघड आहे,” असा दावा राऊतांनी केला.
मनसेचा आंदोलनाचा इशारा
मनसेनेही घटनेचा तीव्र निषेध करत मराठी माणसाला न्याय मिळवून देण्यासाठी रस्त्यावर उतरण्याचा इशारा दिला आहे. “या घटनेचा आम्ही तीव्र निषेध करतो. जर कारवाई झाली नाही, तर मनसे स्टाईलने उत्तर देऊ,” असे मनसे नेत्यांनी म्हटले आहे.
सरकारची भूमिका महत्त्वाची
या संपूर्ण प्रकरणावर राज्य सरकारची प्रतिक्रिया येणे बाकी आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांच्यावर सतत प्रश्न उपस्थित केले जात आहेत. आता राज्य सरकार या प्रकरणात काय पावले उचलणार, याकडे सर्वांचे लक्ष लागले आहे.
Pankaj Helode
