स्वराष्ट्र माझा न्यूज
नवी दिल्ली: केंद्र सरकारने सर्वसामान्यांच्या आरोग्याच्या दृष्टीने एक अत्यंत महत्त्वाचा आणि मोठा निर्णय घेतला आहे. वेदनाशामक म्हणून वापरल्या जाणाऱ्या निमेसुलाईड (Nimesulide) औषधाच्या काही प्रकारांवर आरोग्य मंत्रालयाने आता पूर्णपणे बंदी घातली आहे. विशेषतः १०० मिलीग्रॅमपेक्षा (100 mg) जास्त प्रमाण असलेल्या निमेसुलाईडच्या उत्पादनावर आणि विक्रीवर ही बंदी लागू असणार आहे.
निमेसुलाईड (Nimesulide) : आरोग्यासाठी धोकादायक असल्याने निर्णय
गेल्या काही काळापासून निमेसुलाईड या औषधाच्या दुष्परिणामांवर संशोधन सुरू होते. ड्रग टेक्निकल ॲडव्हायझरी बोर्डाच्या (DTAB) शिफारशीनुसार हा निर्णय घेण्यात आला आहे. शरीरावर, आणि विशेषतः लिव्हरवर होणारे दुष्परिणाम लक्षात घेता हा निर्णय घेण्यात आला आहे. सरकारने जारी केलेल्या अधिसूचनेनुसार, १०० मिलीग्रॅमपेक्षा जास्त डोस असलेल्या या औषधाचे उत्पादन, वितरण आणि विक्री करणे आता बेकायदेशीर ठरणार आहे.
निमेसुलाईड (Nimesulide) : नेमकी बंदी कशावर?
अनेकदा डॉक्टरांच्या सल्ल्याशिवाय मेडिकलमधून पेनकिलर (Painkillers) घेण्याचे प्रमाण वाढले आहे. यात निमेसुलाईड औषधाचा वापर मोठ्या प्रमाणावर होतो. मात्र, आता खालील गोष्टींवर निर्बंध असतील:
-
१०० मिलीग्रॅमपेक्षा जास्त प्रमाण असलेल्या गोळ्या किंवा औषधे.
-
या औषधाचे डिस्पेसिबल टॅब्लेट प्रकार.
रुग्णांनी काय काळजी घ्यावी?
आरोग्य मंत्रालयाने स्पष्ट केले आहे की, रुग्णांच्या सुरक्षिततेसाठी हे पाऊल उचलण्यात आले आहे. निमेसुलाईड हे औषध ताप आणि अंगदुखीसाठी वापरले जाते. मात्र, दीर्घकाळ किंवा जास्त डोसमध्ये हे औषध घेतल्यास यकृत निकामी होण्याचा धोका संभवतो. त्यामुळे रुग्णांनी डॉक्टरांच्या सल्ल्याशिवाय कोणतेही वेदनाशामक औषध घेऊ नये, असे आवाहन तज्ज्ञांनी केले आहे.
औषध कंपन्यांना मोठा फटका
सरकारच्या या निर्णयामुळे औषध निर्माण क्षेत्रातील अनेक कंपन्यांना आपले उत्पादन थांबवावे लागणार आहे. ही बंदी तत्काळ प्रभावाने लागू करण्यात आली असून, बाजारात उपलब्ध असलेला साठा परत मागवण्याचे निर्देशही दिले जाण्याची शक्यता आहे. सार्वजनिक हितासाठी कलम २६ अ (Section 26A) अंतर्गत ही कारवाई करण्यात आली आहे.
