स्वराष्ट्र माझा न्यूज
हैदराबाद येथील एका सिनेमागृहात ४ डिसेंबरला पुष्पा २: द रुल या चित्रपटाचा प्रीमियर आयोजित करण्यात आला होता. या प्रीमियरसाठी प्रमुख अभिनेता अल्लू अर्जुन उपस्थित होता. त्याला पाहण्यासाठी प्रेक्षकांनी मोठ्या प्रमाणावर गर्दी केली. यावेळी झालेल्या चेंगराचेंगरीत एका महिलेचा मृत्यू झाला, तर तिचा आठ वर्षांचा मुलगा गंभीर जखमी झाला.
ही घटना ताजी असतानाच हैदराबादमधील अल्लू अर्जुनच्या घरावर हल्ला करण्यात आला. आंदोलकांनी घरात घुसून तोडफोड केली तसेच टॉमेटो फेकून निषेध व्यक्त केला. या घटनेनंतर अल्लू अर्जुनने प्रतिक्रिया देताना म्हटले की, “या प्रकरणात माझा कोणताही दोष नाही. जे घडले ते अतिशय दुर्दैवी आहे. याबाबत मी माफी मागतो.” मात्र, संतप्त लोकांच्या उद्रेकामुळे परिस्थिती अजूनही गंभीर आहे.
नेमकं काय घडलं?
उस्मानिया विद्यापीठाचे सदस्य अल्लू अर्जुनच्या हैदराबाद येथील जुबिली हिल्समधील घराबाहेर आंदोलनासाठी जमले. त्यावेळी काही आंदोलकांनी घरात घुसून तोडफोड केली आणि टॉमेटो फेकले. मृत महिलेच्या कुटुंबाला एक कोटी रुपयांची मदत आणि इतर शक्य ती मदत करण्याची मागणी आंदोलकांनी केली.
पोलिसांनी परिस्थिती नियंत्रणात आणण्याचा प्रयत्न केला आणि आठ आंदोलकांना ताब्यात घेतले. जेव्हा घटना घडली तेव्हा अल्लू अर्जुन घरात नव्हता, असे पोलिसांनी सांगितले.
भाजपाचा काँग्रेसवर हल्लाबोल
या घटनेनंतर भाजपाचे आंध्र प्रदेश राज्य उपाध्यक्ष विष्णू वर्धन रेड्डी यांनी काँग्रेसवर टीका केली. त्यांनी म्हटले, “काँग्रेसने अल्लू अर्जुनला टार्गेट करून राजकारण सुरु केले आहे. अल्लू अर्जुन दक्षिण भारतातील सर्वात मोठा करदाता आहे आणि त्याच्या घरावर झालेला हल्ला निषेधार्ह आहे.”
अल्लू अर्जुनचा संताप शांत होणार?
घटनाक्रम पाहता, अल्लू अर्जुनच्या समर्थकांसाठी आणि चित्रपटसृष्टीसाठी ही घटना धक्कादायक ठरली आहे. पुढील काही दिवसांत परिस्थिती शांत होते की आणखी गुंतागुंत होते, हे पाहणे महत्त्वाचे ठरणार आहे.
