स्वराष्ट्र माझा न्यूज
मुंबईत आज एक खळबळजनक राजकीय घडामोड समोर आली आहे. खासदार संजय दिना पाटील यांनी सकाळी माध्यम प्रतिनिधींशी बोलताना केलेल्या एका वादग्रस्त विधानाचा आणि शिवीगाळ केल्याचा व्हिडीओ सोशल मीडियावर प्रचंड व्हायरल झाला. या प्रकरणाची दखल थेट मुख्यमंत्री देवेंद्र फडणवीस यांनी घेतली आहे. मुख्यमंत्री फडणवीस यांनी या वक्तव्यावर अत्यंत तीव्र शब्दांत आपली नाराजी व्यक्त केली असून, त्यांनी थेट उपमुख्यमंत्री एकनाथ शिंदे यांच्यासोबत बैठक घेत याविषयी चर्चा केली. सरकारची प्रतिमा मलिन करणाऱ्या गोष्टी खपवून घेतल्या जाणार नाहीत, असा स्पष्ट इशारा मुख्यमंत्र्यांनी दिला आहे.
फडणवीसांनी एकनाथ शिंदेंकडे वाचला नेत्यांच्या वक्तव्यांचा पाढा
मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यात आज मुंबईत एक महत्त्वाची बैठक पार पडली. या बैठकीत मुख्यमंत्र्यांनी खासदार संजय दिना पाटील यांच्या वक्तव्याची गंभीर दखल घेत संताप व्यक्त केला. लोकप्रतिनिधींनी माध्यमांशी बोलताना नेहमी तारतम्य बाळगायला हवे, अशी भूमिका फडणवीसांनी मांडली. यापूर्वीही काही नेत्यांनी आणि पदाधिकाऱ्यांनी केलेल्या वादग्रस्त वक्तव्यांचा पाढाच मुख्यमंत्र्यांनी शिंदेंच्या समोर वाचला. माध्यमांशी अशा अर्वाच्य भाषेत बोलणाऱ्या खासदारांना कठोर शब्दांत तंबी द्या, अशी स्पष्ट सूचना फडणवीसांनी उपमुख्यमंत्री शिंदेंना दिली आहे.
एकनाथ शिंदेंचा संजय दिना पाटील यांना दिलगिरीचा सल्ला
या वादाच्या पार्श्वभूमीवर उपमुख्यमंत्री एकनाथ शिंदे यांनी आपली भूमिका स्पष्ट केली. पत्रकारांचा अवमान कोणत्याही परिस्थितीत सहन केला जाणार नाही, असे सांगत शिंदे यांनी खासदार संजय दिना पाटील यांच्याशी स्वतः फोनवरून चर्चा केली. तसेच त्यांना माध्यमांची जाहीर दिलगिरी व्यक्त करण्याचा सल्ला दिला आहे.
संजय दिना पाटील यांनी दिली सफाई
या संपूर्ण प्रकरणावर खासदार संजय दिना पाटील यांनी उपमुख्यमंत्री एकनाथ शिंदे यांच्याकडे आपली बाजू मांडली. पत्रकारांबद्दल अपशब्द वापरण्याचा किंवा त्यांच्या भावना दुखावण्याचा आपला कोणताही हेतू नव्हता, असा दावा पाटलांनी केला आहे. “माझे पत्रकारांशी नेहमीच चांगले संबंध राहिले आहेत. मात्र, काही जण सातत्याने माध्यमांसमोर अत्यंत खालच्या पातळीवर जाऊन भाषा वापरतात, त्याबद्दल मनात असलेला राग बाहेर आला,” अशी सफाई त्यांनी दिली.
या संपूर्ण प्रकरणामुळे महायुती आणि महाविकास आघाडीत राजकीय आरोप-प्रत्यारोप तीव्र झाले आहेत. मुख्यमंत्र्यांच्या आक्रमक पवित्र्यानंतर आता खासदार संजय दिना पाटील या वादावर अधिकृतपणे कधी आणि कशी दिलगिरी व्यक्त करतात, याकडे सर्वांचे लक्ष लागले आहे. तसेच, आगामी काळात अशा वादग्रस्त विधानांमुळे सरकारची प्रतिमा खराब होऊ नये म्हणून लोकप्रतिनिधींवर काही बंधने येतात का, हे पाहणे महत्त्वाचे ठरेल.
