मुंबई: राज्य निवडणूक आयुक्त दिनेश वाघमारे यांनी आज महाराष्ट्रातील प्रलंबित स्थानिक स्वराज्य संस्थांच्या निवडणुकांची घोषणा केली आहे. सर्वोच्च न्यायालयाच्या निर्देशानंतर, राज्यातील २४६ नगरपरिषदा आणि ४२ नगरपंचायतींसाठी हा नगरपरिषद निवडणूक कार्यक्रम जाहीर करण्यात आला आहे. या घोषणेनुसार, येत्या २ डिसेंबर २०२५ रोजी मतदान होणार असून, ३ डिसेंबर २०२५ रोजी मतमोजणी पार पडेल.

या घोषणेमुळे राज्यातील राजकीय वातावरण तापले आहे. विशेष म्हणजे, या निवडणुकीत बनावट किंवा दुबार मतदान रोखण्यासाठी निवडणूक आयोगाने अत्यंत कठोर पाऊले उचलली आहेत. यासाठी एक विशेष यंत्रणा आणि ॲप (APP) देखील तयार करण्यात आले आहे.

असा आहे संपूर्ण निवडणूक कार्यक्रम

राज्य निवडणूक आयोगाने जाहीर केलेला सविस्तर निवडणूक कार्यक्रम खालीलप्रमाणे आहे:

• उमेदवारी अर्ज दाखल करणे: १० नोव्हेंबर २०२५ पासून
• उमेदवारी अर्ज मागे घेण्याची तारीख: २१ नोव्हेंबर २०२५
• मतदानाचा दिवस: २ डिसेंबर २०२५
• मतमोजणी: ३ डिसेंबर २०२५

निवडणुकीची व्याप्ती: १ कोटीहून अधिक मतदार

ही नगरपरिषद निवडणूक अत्यंत व्यापक स्तरावर होत आहे. या प्रक्रियेत एकूण १ कोटी ७ लाख ३ हजार ५७६ मतदार आपला हक्क बजावतील. या निवडणुकांमधून ६,८५९ सदस्य आणि २८८ अध्यक्षपदे निवडली जाणार आहेत.

या निवडणुका प्रामुख्याने कोकण (२७), नाशिक (५९), पुणे (६०), आणि नागपूर (५५) या विभागांमधील नगरपरिषदा आणि नगरपंचायतींसाठी होत आहेत. यासाठी एकूण १३,३५५ मतदान केंद्रांवर ६६ हजार कर्मचारी आणि अधिकाऱ्यांची नियुक्ती करण्यात आली आहे.

दुबार मतदारांवर ‘डबल स्टार’ वॉच!

या वेळच्या नगरपरिषद निवडणूक प्रक्रियेतील सर्वात महत्त्वाचा बदल म्हणजे दुबार मतदारांवर ठेवण्यात येणारी करडी नजर.

• आयोगाने मतदारांना त्यांचे नाव आणि मतदान केंद्र शोधण्यासाठी एक नवीन ॲप (APP) उपलब्ध करून दिले आहे.
• ज्या मतदारांची नावे एकापेक्षा जास्त ठिकाणी आढळली आहेत, अशा मतदारांना यादीत ‘डबल स्टार’ ने चिन्हांकित करण्यात आले आहे.
• असा मतदार जेव्हा मतदान केंद्रावर येईल, तेव्हा त्याला एकाच ठिकाणी मतदान करता येईल आणि मतदानापूर्वी त्याच्याकडून एक प्रतिज्ञापत्र (Affidavit) लिहून घेतले जाईल.

प्रशासकीय तयारी पूर्ण

उमेदवारांना त्यांचे अर्ज ऑनलाईन पद्धतीने भरता येणार आहेत. तसेच, जातवैधता प्रमाणपत्र अर्जासोबत जोडणे बंधनकारक असेल, किंवा त्यासाठी अर्ज केल्याची पावती तरी द्यावी लागेल. संपूर्ण निवडणूक प्रक्रिया ईव्हीएम (EVM) आणि बॅलेट युनिटद्वारे पारदर्शकपणे राबवण्यासाठी प्रशासन सज्ज असल्याचे आयुक्त दिनेश वाघमारे यांनी स्पष्ट केले.

या नगरपरिषद निवडणूक घोषणेमुळे सर्वच राजकीय पक्षांनी आपापल्या स्तरावर मोर्चेबांधणी सुरू केली असून, आगामी महिनाभर राज्यात प्रचाराचा धुरळा उडणार हे निश्चित.