By स्वराष्ट्र माझा न्यूज 
विधानसभा निवडणुकीच्या पार्श्वभूमीवर जरांगे पाटलांनी मराठा समाजाच्या उमेदवारांची यादी उभी करण्याचा निर्णय घेतला आहे. लवकरच हे उमेदवार कोणते असतील आणि त्यांच्या विरोधात कोणते नेते उभे राहतील, याबाबतची माहिती जरांगे पाटील जाहीर करणार आहेत. याच अनुषंगाने, ओबीसी समाजाचे नेतृत्व करणारे लक्ष्मण हाके यांनी ओबीसींसाठी स्वतंत्र उमेदवारांची यादी तयार असल्याचे सांगून आक्रमक पवित्रा घेतला आहे.
लक्ष्मण हाके म्हणाले, “जरांगे पाटलांनी ४ तारखेपर्यंत उमेदवार जाहीर केला नाही, तर ते हॉस्पिटलमध्ये अॅडमिट असतील,” असा टोला मारताना, “जरांगेंच्या यादीला ओबीसींची यादी तयार आहे,” असे त्यांनी ठणकावले. तसेच, ओबीसी आरक्षणाबाबत जरांगे पाटलांची भूमिका नेमकी काय आहे, असा सवाल त्यांनी आनंदराज आंबेडकर यांना केला.
हाके यांनी जरांगे पाटलांवर टीका करताना सांगितले की, “जरांगे राजकारणातील अनुभव नसलेले आहेत आणि त्यांच्या विधानांमध्ये स्थिरता नाही. ओबीसी समाजाला योग्य दिशा देऊन आम्ही त्यांना मतदानातून त्यांची ताकद दाखवायला प्रवृत्त केले आहे.”
ओबीसी समाजाला राजकीय महत्त्व देण्यासाठी, हाके यांनी समाजातील प्रत्येक घटकाला एकत्र येऊन त्यांच्या हक्कांसाठी उभे राहण्याचे आवाहन केले. “ओबीसींनी आता जागे झाले नाही तर २०२४ नंतर त्यांचे आरक्षण संपेल,” असे हाके यांनी स्पष्ट शब्दांत इशारा दिला.
ओबीसी समाजाचा राजकीय आवाज अधिक बळकट करण्यासाठी लक्ष्मण हाकेंचे आव्हान सध्याच्या राजकीय परिस्थितीत ओबीसी समाजाने आपले हक्क आणि स्थान मजबूत करण्यासाठी प्रयत्न सुरू केले आहेत. लक्ष्मण हाके यांनी या लढ्यात समाजासाठी रणशिंग फुंकले असून, जरांगे पाटलांच्या यादीला उत्तर देण्यासाठी सज्ज झाले आहेत.